Bonberenea 26 Urte! | Bonberenea

Bonberenea 26 Urte! - Garai nahasi hauetan, askatasuna, elkartasuna eta autokudeaketa!

Bonbereneari buruz zerbait esan behar izanez gero, esango genuke gure etxea dela. Beste urtebete egin dugu etxe honetan, gure egin dugun gune honetan. Aurtengoa ospakizun borobila da. 26 urte bete ditugu eta oraindik ere gogor dihardugu lanean, betiko moduan!

Etxe honek betiko dinamikarekin jarraitzen du baina lehen eguneko sugarrari eta aurrera egiteko gogoari eusten zaie, erosotasunean erori gabe. Pandemiak gauzak egiteko beste modu batzuk erakutsi dizkigu eta horietara moldatzen ere asmatu dugu, nahiz eta urak lehengo lekura itzuli diren. Proiektua sortu zen garaian, inguruan somatzen genuen kultur dinamika gabezia edo hutsunea bete genuen kultur jarduera bermatzeko eragile gisara. Gaur egun asmo horrekin jarraitzen dugu. Etxeak etengabeko bilakaerarekin jarraitzen du eta belaunaldi berriek ere egin dute euren lekua. Aldaketetara egokitzen jakin dugu eta etxeak aurrera jarraitzen du, hori baita garrantzitsuena. Horren islada serigrafi tailerra da, erabat martxan dagoela.

Aldaketak bizitzaren parte dira eta horma hauen barruan gertatzen den aldaketa orok zerbait berria suposatzen du. Azkenaldian etxean hainbat lan egin ditugu. Instalazio elektrikoak berritu, etxeko sarbideen argiztapena hobetu, kanpoko txabolaren teilatua berritu, pintaketak… Azken horien bidez kulturari kolorea ematen diogu, udazkenak negurako bidea hartzen duenean etxeari kolorea emanez.

Etxeko martxari eustea bera ere ikasketa prozesu bat da bertako kideontzat. Beti dago zerbait ikasteko aukera: musika tresna bat jotzen, soinu edo argi teknikari lanak, sukaldaritza… Gure baliabideekin egin dugu aurrera urte hauetan guztietan eta ikasitakoa datozen belaunaldiei transmititzea ezinbestekotzat jotzen dugu.

Etxeko oholtzak sutan jarraitzen du eta hori horrela izan dadin lan handia egin dugu. Musika gure ardatzetako bat da. Bonberenea ezin da ulertu musikarik gabe eta maitasun handiz egiten dugu musikaren inguruan lan. Urtez urte eta pandemiak pandemia, talde ugari pasatu dira eszenatoki honetatik. Batzuk ezagunak, besteak ez hainbeste, talde berriak, betikoak… Munduko hainbat tokitatik bisitatu gaituzte aurtengo 50 kontzertu baino gehiago gure etxean eskeinteko. Estilo eskaintza anitza biltzen du gure programazioak eta hori ere mimoz zaintzen digu, ahalik eta eskaintzarik aberatsena jartzeko musika zaleen esku, gustu guztietara egokituta.

Bonberenea txaranga etxearten urteurren batean sortu zen festa egiteko aitzakiarekin, 20 urte pasa dira lehen emanaldi hartatik eta gauzak dira gelditzen. Harrezkero, 6 disko grabatu dira etxeko estudioan, zuzeneko DVD bat eta 220 emanaldi baino gehiago eskaini dituzte Euskal Herriko hainbat txokotan, artista ezberdinekin elkarlanean, pailazoak, musikariak… baita ere, elkarteekin eta hainbat talderekin. Urte guzti hauetan Txarangatik jende asko pasa da, pertson guztiek gauza bat dute amankomunean, oso txikitatik trebatu dituzte kide zaharrenek. Filosofia honekin jarraituz txaranga autogestionatu bat lantzen jarraituko dugu, jendeari eta erronka berriei aurre egiteko.

Etengabeko bilakaeraren beste adibide bat gure tabernako eskaintzarena da. Urte askotan ohiko garagardoekin lan egiten aritu eta gero, etxeko garagardoa eskaintzen diegu orain gurera datozenei. Bonbier “Olki” American Pale Ale eta Bonbier “Liztor” Pilsen garagardoak dauzkagu. Bi izen horiek ez dira ausaz aukeratuak. Gure bi txakurren omenez jarriak dira, etxeko zaindari eta lagun ditugunak. 2022 urtean Olki-ri agur esan behar izan genion, eskertu nahi dizkiogu 12 urte hauetan etxea zaintzen egin duen lanarengatik. Zauden tokian zaudela, gure bihotzetan jarraituko duzu.

Bonberenea irratiak ere aurrera darrai. Etxeko estudioan ekoiztutako musikaren bozgorailu izaten jarraitzen du 26. urtemuga honetan . Aurten hainbat disko kaleratu dira, Arima “Beldurrez beste egitean”, Lepora “Zulotik”, Argazki bat behelainoan “Segurtasun eza”, Rodeo “Rodeo-Dilmun”.. estudioan berriz 12 disko grabatuak izan dira

Grabatuko den musika horren zati bat Bonberenea Ekintzak zigiluarekin argitaratuko da. 21 urteko bidea osatu du zigiluak eta denbora tarte horretan 117 erreferentzia argitaratu dira. Baliabideri ez zuten taldeei beraien musika grabatu eta argitaratu ahal izateko plataforma bezala ekin zion bere bideari eta 21 urtean estudio txikitik berrirako bidea eta gaur egun sona handia duten talde ugariren oinarriak finkatzen lagundu duen egitasmoa izan da. Eta noski, horretan jarraitzea da helburua.

Amaitzeko, argi utzi nahi dugu gure posizioa eta lekua etengabe defendatzen jarraituko dugula. Mende laurdena baino gehiago daramagu gure lana egiten: kultura indartzen eta eskuragarri egiten, bai publikoarentzat eta baita talde hasiberrientzat ere. Gure ustez hori da gure egitekoa, gure lana eta gure jardunari zilegitasuna ematen diona. Horregatik, 26 urteko esperientziaren zakua bizkarrean hartuta, Bonbereneak inoiz baino zilegitasun gehiago du, inoiz baino beharrezkoagoa da.

Besterik gabe, guk hemen jarraituko dugu. Etxeko ateak zabalik daude gure jardunean parte hartzera animatzen den ororentzat.

IZAN PIROMANO ETA ZABALDU SUA!

Informazio gehiagorako:

Bonberenea 26 urte

Bonberenea 26 Urte! - Garai nahasi hauetan, askatasuna, elkartasuna eta autokudeaketa!